Doce Lúas

Sinopse Un novel licenciado en Farmacia arriba desde o sur a unha vila mariñeira. Mocea, casa e comeza un proxecto vital. Viven das crebas que o mar deita no areal. Mais o infortunio chega nunha marea para tronzar a felicidade da familia. Un galeno local receita baños de sol e mar no Atlántico para a filla adolescente. Certo día de calma chicha, unha manda de arroaces achégase ao áxil nadar da cativa e esta vira o sentido da súa derrota fuxindo pola escorrentía cara ao horizonte. Doce lúas é o diario dun home que decide encasar e outear meditativo o mundo que o rodea. Un ano escrito desde o descarnado sentir. Textos de Héctor Pose (Malpica, 1964) e imaxes de Alberto Rguez. Fariña (Malpica, 1983) que maridan con sutil elegancia para descifrar o convivir en contextos miúdos onde a identidade, os patrimonios, a paisaxe e a condición humana revelan aspectos da face que nos compón e define. A experiencia do tempo que vive o ser, escrita como se a existencia pedise un haikai para cada instante.